Margadeepam Scholarship Kerala
മാർഗ്ഗദീപം സ്കോളർഷിപ്പ്: വിശദാംശങ്ങൾ
2025-26 സാമ്പത്തിക വർഷത്തിലെ ന്യൂനപക്ഷ മതവിഭാഗത്തിൽപ്പെട്ട വിദ്യാർത്ഥികൾക്കുള്ള മാർഗ്ഗദീപം സ്കോളർഷിപ്പിനായുള്ള അപേക്ഷാ തീയതി നീട്ടിയിരിക്കുന്നു. അപേക്ഷകൾ സമർപ്പിക്കേണ്ട അവസാന തീയതി സെപ്റ്റംബർ 22 ആണ്.
കേരളത്തിൽ സ്ഥിരതാമസമാക്കിയ, സർക്കാർ അല്ലെങ്കിൽ എയ്ഡഡ് സ്കൂളുകളിൽ ഒന്നു മുതൽ എട്ടു വരെ ക്ലാസ്സുകളിൽ പഠിക്കുന്ന ന്യൂനപക്ഷ വിദ്യാർത്ഥികൾക്ക് ഈ സ്കോളർഷിപ്പിന് അപേക്ഷിക്കാം. അപേക്ഷിക്കുന്ന വിദ്യാർത്ഥികളുടെ കുടുംബത്തിന്റെ വാർഷിക വരുമാനം 250000 രൂപയിൽ കവിയാൻ പാടില്ല. സ്കോളർഷിപ്പ് തുകയായി 1500 രൂപ അനുവദിക്കും. അപേക്ഷകൾ സ്കൂൾ തലത്തിൽ ഓൺലൈനായി സമർപ്പിക്കാവുന്നതാണ്.
ഈ സ്കോളർഷിപ്പ് മുസ്ലിം, ക്രിസ്ത്യൻ (എല്ലാ വിഭാഗക്കാരും), സിഖ്, ബുദ്ധ, ജൈന, പാഴ്സി മതവിഭാഗങ്ങളിലെ വിദ്യാർത്ഥികൾക്ക് ലഭ്യമാണ്. ജനസംഖ്യാനുപാതികമായിട്ടായിരിക്കും സ്കോളർഷിപ്പ് അനുവദിക്കുക. സ്കോളർഷിപ്പിന്റെ 30% പെൺകുട്ടികൾക്കായി സംവരണം ചെയ്തിരിക്കുന്നു. മതിയായ അപേക്ഷകരെ ലഭ്യമല്ലെങ്കിൽ ആൺകുട്ടികളെയും പരിഗണിക്കുന്നതാണ്.
അപേക്ഷിക്കേണ്ട രീതി
സ്ഥാപനമേധാവികൾ അപേക്ഷാ ഫോം വിദ്യാർത്ഥികൾക്ക് ലഭ്യമാക്കണം. വിദ്യാർത്ഥികളിൽ നിന്ന് ശേഖരിക്കുന്ന വിവരങ്ങൾ കൃത്യമായി പോർട്ടലിൽ രേഖപ്പെടുത്തേണ്ടതും സ്ഥാപനമേധാവിയുടെ ചുമതലയാണ്. ആവശ്യമായ രേഖകൾ വിദ്യാർത്ഥികളിൽ നിന്നും ശേഖരിച്ച് സൂക്ഷ്മ പരിശോധന നടത്തിയ ശേഷം സ്ഥാപനത്തിൽ സൂക്ഷിക്കണം. ന്യൂനപക്ഷക്ഷേമ ഡയറക്ടറേറ്റ് ആവശ്യപ്പെടുമ്പോൾ ഈ രേഖകൾ ലഭ്യമാക്കണം.
വിദ്യാർത്ഥികൾ സമർപ്പിക്കേണ്ട രേഖകൾ
- വരുമാന സർട്ടിഫിക്കറ്റ്
- ജാതി സർട്ടിഫിക്കറ്റ് (മൈനോറിറ്റി / കമ്മ്യൂണിറ്റി സർട്ടിഫിക്കറ്റ്)
- ബാങ്ക് പാസ് ബുക്ക് പകർപ്പ്
- റേഷൻ കാർഡിന്റെ പകർപ്പ്
- ആധാറിൻ്റെ പകർപ്പ്
- ഭിന്നശേഷി സർട്ടിഫിക്കറ്റ് (ബാധകമെങ്കിൽ) (40%ത്തിനു മുകളിൽ വൈകല്യമുള്ളവർ)
- ഗ്രേഡ് ഷീറ്റിന്റെ പകർപ്പ് (അക്കാദമിക വർഷം 2024-25)
- അച്ഛനോ/അമ്മയോ/രണ്ടുപേരും മരണപ്പെട്ടിട്ടുണ്ടെങ്കിൽ മരണ സർട്ടിഫിക്കറ്റ് (ബാധകമെങ്കിൽ)
സ്ഥാപനമേധാവി വിദ്യാർഥികളിൽ നിന്നും വിവരങ്ങൾ സ്വീകരിക്കുന്ന അവസാന തീയതി സ്കൂളിൽ ചോദിച്ച് അറിയുക.
പ്രധാനപ്പെട്ട തീയതികൾ
വിദ്യാർത്ഥികൾ സ്കോളർഷിപ്പിനായി അപേക്ഷ സമർപ്പിക്കേണ്ട അവസാന തീയതി: 2025 സെപ്റ്റംബർ 22
കൂടുതൽ വിവരങ്ങൾക്കും അപേക്ഷാ ഫോമിനുമായി ന്യൂനപക്ഷക്ഷേമ വകുപ്പിന്റെ ഔദ്യോഗിക വെബ്സൈറ്റ് സന്ദർശിക്കുക.
ഫോൺ: 0471 2300524
